حکایة الدرویش وابن السلطان

اهناک مهناک، اکو فرد سلطان عنده مَرَه. فرد یوم المره حِبْلَت و جابت فرد ولد مثل الگمر گام الولد یِرْضَع و جابولَه دَایه و گامت تْرَضْعَه عُگب چم سنه صار عمره ثلث سنین گام السلطان جاب له مُلّا بالبیت و ما خَلَّاه یِطْلَع بَرَّه من مَحِبْتَه، و الولد صار عمره اربع سنین و ما شایف الدَرُب و السوک.


الولد هو طِلَع باب الحوش شاف دِنْیا وخَلْق، إِتْعَجَب. و شاف الْدِوَابْ، یسأله العمه یگله: عمی هَذولَه شنو یگله هذوله الله خالِقْهُم الی ان جَوْ لِلْتُکَّان و فَتْحَوا التُکَان و گِعد الولد یِقْرَه قُرآن کل یوم الولد یجی للتکان و یقره قرآن أَتاری من یگوم یقره قرآن یجی فرد دَرْویش ویُوگَف یَمَّه ویِسْمَع. الولد شافه و گام گله الی عمه یا عمی هذا شنو یجی یمی؟ گام عمه و گله یا بابا درویش شِتْرید إِهنایه وَاگُف یِرْجَع البابا درویش یگله انتَ شَعْلیک گله: شنو إِنت شعلیک گله والله إِتْخَلّونی اتخلونی. من ما تخلونی تره أَحْرُمْکُم شَوفْتَه. أبو الولد چان واگف من سمعوا بهالحچایه گالوا هذا الدرویش أخاف وَلِی گاموا گالوله إِستریح یا بابا درویش انتَ هالیوم مَعْزوم عندنا گال إِلهم: میخالف.

صار وکت المغرب وجو للبیت وحِچولهَا لأم الوَلَد وگامت وگْعَت علی البابا درویش وگالت له: یا بابا درویش هذا الولد إِمسَلَّم بیدک مثل وِلْدَک، کل یوم تَاخْذَه الصُبِح و تجیبه المغرب کلها میخالف الدرویش أسمه شیخ مْحَمَّد هذا هم کل یوم یاخذه ویروح یِتوَنَّس و یعلمه علی الِدْروب هذا فِلان (دَرُب) وهذا فلان درب. گله: عمی های شِلون الدنیا حِلْوه. لأن الولد من گام یمشی وَیّه الدرویش گام یسمیه عمی. رجع گله بس ما دام انتَ هالِولایه مِتْعَجِب بیها، بَسْ لو تشوف ولایه مصر چان إِتعجبت اکثر گله عمی شنو مصر گله إِوْلایه إِشلونها إِذا تْرید إِتروح گول الی أَهلک من یِرْضون انتَ گلی و نِمْشی هو الولد من چا للبیت گالوله أَهله گوم إِتْعَشَّه گال إلهم آنا ما أرید أرید اطلع الی تروح؟ کلهم: ویَّه الباب درویش گاموا ما خَلَّوه. هو هم گام ما یجی عندهم ولا ینام ولا یاکل. هُمَه أَهله إِهوایَه إِیحبوه گاموا شَافَوا ما گِیِطْلَع دَرُب گالوله روح صیح الباب درویش هو هَمْ جا علیه گله عمی گوم تَرَه یمکن أَهلی رِضَوا.

هو من سمع الباب درویش گام وجَا ویاه الی أنْ جو للبیت، گامَتْ أم الولد وِکْعَت علی البابا درویش گالت له هذا مثل ولدک مثل ما ضِگْت الخُبِز و الملح تِتْگَیَّد علیه. گال إِلهم میخالف هذا ولدی وأَدَاریه مثل إِعیونی. عُگب إِسْبوعین حَضِّرولْهُم غَرَاص وگاموا مِشَوا. أَشو من طِلعوا الولایه گام الدرویش طَلع دُنْبُرْکَه وطلع عُودَه مکتوبه ودَک الدنبرکه و طلعوا إِخیول إِثنین وگَلّه گوم إِرکب وِحْدَه و آنا وِجْدَه من رکبوا عگب ساعه وصلوا الی ولایة مصر و گاموا کِرَوْا فَرِد حُجْرَه بالخَان وکِعْدَوا. عُگب ما گِعدوا یجی شهر الولد من یشوف هَلْ أَشیاء یِتعجب یگله عمی إِشْلون هَایْ إِولایه.

یگله إِصْطُبُر هسه أَفَرْجَک بعد أشیاء. گام الدرویش فَکّ لَه تُکَّان مال إِبْزَازَه للولد کل یوم یِفَتِّح من الصبح و یعَزِّل وکت المغرب فَرد یوم صاح الدلال بالولایه نهار السبت لا أحد یُگْعُد بالِسْوَاگَه خَلّی یِفَتْحون و یروحون لبیوتهم بنت السلطان ترید تِطْلع تِتْفرج. صار یوم السبت کل الِسْوَاگله إِنْفِتْحَت ومابیها أَوَادِم. أتاری من صاح الدلال الولد ما سِمَع. راح ومن الصبح فَتَّح وگِعَد بالتکان عُگب ساعة و چان تجی العَرَبَانَه تمشی یَوَاشْ یَوَاشْ و بنت السلطان مْفَرْعَه من حَلاتْهَا السوک ظلمة صار ضَاوِی. الولد من شافها خِرَب، و چان یُوگَع من التکان و چان یصیر جَوَه السِکَملِی صار وکت المغرب الدرویش شاف الوَلَد بعد ما جَا إِتْعَجَب گال إِبْعَقله أَخاف الیوم فَتَّح وشافها البنت السلطان و خِرَب. وجا علی التکان شَافَه نایم خَرْبَان. گام جَاب لَه مای وَرِد ورَش لَه و گِعَد، گله شنو هالحجایه؟ گام گله: یا عمی، آنی گاعد ما شِفت الاّ جَت العَرَبانه تمشی، وبیها بنت السلطان آنی شِفِتْها و گَعِت ما حَسَّیت علی نفسی الا هَسَّه.

رِجَع الدرویش (گله) یا ولدی ترید أَجیبلَکْیَاهَا باللیل هی وإِفْراشها لکن لاتِتْحَرَش بیها؟ گله لَعْ گاموا وجَوْ بالحجره بالخان الی أن صار ساعه بالثلاثه گام الدرویش وقِرَه قِرَه ما شاف الولد الا أِنْشَک السَگُف ونِزْلَت الجُرْبایه وعلیها بنت السلطان نایمه مثل الفُضه تِلْهَث من حَلاتها. گام الولد و گَعَّدْهَا، ویِتْصَارع ویاها.هی من گِعْدت شافت شِنو هَالوجوه و ظل یتصارع ویاها وَیَّبِّوس بیها الی أن صار وکت الشافعی. گام الدرویش و قره قره و إِنْشَال التَخَت وراح هی هَم البنیه من طلعت الشمس گامت ضَمَّتْها الحِچَایه بْگَلُبْهَا، و گالت بَلْکَت هذه الحچایه بالمنام. صار ثانی یوم و هم قِره الدرویش وجت و گام الولد گَعَّدْهَا و هم إِتْصارع ویاها. إِتْعَجِبَت صار وکت الشافعی وهم قره علیها وراحت هی البنیه ظلت علی هالحاله سبع تِیَام عگب السبع تیام گامت و حِچَت لَهِلْهَا گالت لهم هیچی و هیچی الحچایه گاموا گالولها أَخاف إِنتِ شایفه منام گالت لهم و الله أَغاتی إنتو هالیوم إِگعدوا و شوفوا هُمه هَمْ گِعْدَوا صار ساعه بالثلاثه من اللیل ما شافوا الا إِنْشَک السگف و الچربایه گالت هیچ و طِلْعَت.

همه شافوها إِتْعَجِبَوا و گاموا صِعْدوا فوک الصَطِح ما شافوها گاموا گالو بَاجِر إِنْشِد بالتَخت إِقنادیل و نصعد فوک الصطح و إِنْشوف وین یُوگع التخت، إِنْذِر عسکر من الصبح و إِنِشوف منو هذا الْگَیْسَوِّی هَلْ شِی صار نص اللیل گام و قره الدرویش بیت السلطان گاعدین ما شافوا الا إِنْکِشَفت السَگُف و طلعت الچربایه ویاها القنادیل الأربعة الدرویش هو شاف القنادیل گام قِرَه قِرَه و سِّوی الدنیا و السماوات کلها قنادیل. من شافوا بیت السلطان إِتعجبوا من هالحچایه و لَمِّن نِزْتَت القنادیل نزلت فرد نَزْلَه و ما عرفوها، گالوا الله هذا إِشلون آدمی، و الله لو نِعِرْفه چان گَطِّعْنَاه گُطْعَه گَطْعَه و گالوا باجر إِنجیب فرد عجوز، و إنْشِدْهَا بالچربایه، و هی تِنْدَل بأی بیت.

صار ثانی یوم گاموا جابوا فرد عجوز و شدوها بالچربایه و صار نص اللیل إِنْکِشَف السَگُف و طِلَع و العجوز إِمْعَلِّگَه و نزلت الچربایه و البنیه نایمه و العجوز مَشْدوده گام گال الدرویش: إِیه یا عجوز اللعنه علیچ إِتجوز.

آخر اشلون إرْضیتِ تنْشَدِّین گام قره و چان یطلعون یجی أربعین جنی عُرْضَه شِبِر و طوله فِتِر گال إلهم بُولوا و لَوْخوا بوْلکُم بالتراب و سَوْوه لِگَالیک و إِضربوها همه من سمعوا گاموا بالوا و جابوا إِترَاب و لاخوه و سووه لگالیک و گاموا یضربوها عَلْمَا ماتت و هی مشدوده و گام إبن السلطان گَعَّد البنیه وباسها و تصارع ویاها وگِرَصْهَا الی أن صار وکت الشافعی و راحت الچربایه هذوله بیت السلطان (من صار من الصبح) گاموا و خَلَّوا دَلاَّل إلَه الرای و الامان الذی کل یوم گَیْسوی هیچی و هیچی. گام طِلَع الدرویش گال إِلهم آنی و هذا بیتنا. من سمع الدلال جا علی السلطان و گله إِلْگَینَاه هو بفلان خان نازِل. السلطان من سمع بِعَث علیه أَوادِم دَیجیبوه و یقَرِّروه شنو هالحچایه؟ وگام السلطان وراح لِلْصَرَای و انِّصَب الْمَجْلِس. السلطان من دَز علی الدرویش جَوْ علیه گالو له: گوم السلطان یریدک.

گال إِلهم ما أروح شیرید خَلِّی هو یجی لی عنی الْمَامُور الچبیر بیده خَیزَرَانَه گام یرید یضربه بالخیزرانه ما شاف رُوحه الا گاعد بنص المجلس إ‍زْمَالَه گاموا أَهل المجلس گالوله شِنو های وِلَک گال إِلهم ما أدری آنی دا أرید أَضُرْبَه و هیچی صِرِت. همه هم أَهل المجلس من شافوه گالوا یا سلطان جوز عنّه. هو هم خاف و جاز. الدرویش من شاف السلطان دز علیه أَوَادِم گام (خَلّاها الحچایه تِعْتَک)، عگب اسبوع بِعَث خَبَر الدرویش خلی باجر السلطان و الوزراء یِجون یِتْعَشون عنی من سمع السلطان گال هذا شنو إِنْروح عِنده رَد الوزراء گالوله میخالف یا سلطان ولو عنده خبز و بصل. گام السلطان  ودز لَه خبر باچر نجی. هو هم الدرویش، گام وقره علی الحجره و سَوَّاها مثل البستان و سَوَّه بالبستان شَذِرْوَانَات إثنین واحد یذِّب علی الْلَخَر. صار ثانی یوم جو السلطان و الوزراء العشره و خَشِّوْا همه خشوا و شافوا هالبستان وها الشذروانات واحد یذب علی اللاخر، إِتْعَجبوا و تْحَاچَوا بیناتهم گالوا هذه إِمنین إِلَه هَالْشِی گالوا: دَنِنِشْدَه شنو هالشذروانات.

وجو ونشدوه گالوله: شنو هالشذروانات؟ گال إِلْهُم الذی یِسبَح بْهَذا و عُمره سبعین سنة یِطْلَع عُمره خمسه و عشرین بْقُدْرَة الله السلطان و الوزراء کلهم عمرهم نَاسْ سبعین و ناس خمسه و ستین و گاموا نِزْعَوا إِهْدومْهُم و طُمْسَوْا من طمسوا طِلْعَوا فرد سُوَه و شافوا نفسهم کلهم صاروا عبید، و طلعوا گالوله: رُدْنا سُوَه، و شافوا نفسهم کلهم صاروا عبید، و طلعوا گالوله:رُدْنا و نْسِّوِیک وزیر عند السلطان.

الدرویش من شافهم إِنْگُلْبَوا قره و چان یطلع فرد آدمی گله روح شِد هَذولَه وبیعهم بالسوک هنو هم گام وشدهم و أَخذهم، همه یِگلْولَه یا مْعَوِّد إِحنا وزراء و سلاطین هم یجرهم بالحبل و یگلهم إِمشوا تریدون تِنْهزمون؟ و یضربهم رجعوا گالوله للدرویش (هَسّه الخاطر الله) انتَ شترید مِننا و هیچی سویت بینا؟ گال الهم أَرید بنت السلطان الی إبنی.

همه من سمعوا گالوله نِنْطیک عهد و میثاق من انتَ تُرَُدْنَا هسه نِنْطِیکِیَّاهَا. هو هم گام قِرَه علیهم و گِلَهُم مثل ما چانوا بالاول همه شافوا نفسهم (مثل ما چانوا) وگاموا وجوا للبیت و صاح الامایم و گطع مهر. ظل الدرویش و إِبنه یجی خمسین یوم و گالوله للسلطان:إِحنا إِنرید نروح لولایتنا و إِهناک الولد یدخل گال إلهم میخالف. گام جَهَّزلهم و إِنْطَاهُم غَراض. عگب چم یوم مشوا و جوا الی ولایتهم. أَول ما وصلوا دگوا الباب گالوا منهم گالولهم: إِحنا، ویّاهم الغراض فکوا الباب شافوهم وگامت بَاسِتَه وهلهلت و حطوها للعروس بالگبة عگب اسبوع گاموا سووا عرس وسووله ساس سبع تیام و دخل الولد وجا الدرویش و ظلوا گاعدین مِتْونسین عگب چم شهر جا البابا درویش علی ابو الولد و الولد و تْسَالم ویاهم و گلهم انا صرت مثلکم و هسه أرید اروح الی اهلی گالوله لا إِحنا إتعلمنا علیک گال الهم ما یصیر و هسه انا ارید منکم رُخْصَه همه گاموا و انطوه غراض و مشی و همه ظلوا گاعدین علی احسن حال چنه عندکم وجینه.  

============================================

الولد الاربع تشبار والاربعين ديو

اهناك مهناك، أكو فرد رجال عنده ثلث ولد وابنيه، فرد يوم گال يا ولدي تره أكو علی الرف بُطُل بيه دُوَه لا أحد يِلْعَب بيه. گالوله: لَعْ يَابَه، شِنو شُغْلنا بيه. البنيه أثاري ما تدري البنيه لَمَّنْ گال أبوها، عگب جم شهر گام أبوها إِتْوَجَّع و مات. عگب چم يوم گام أخو البنيه الچبير گَالِّلْهَا دَادَه أَجيب لِچ شِجَر إِتْرَكْبيلنا گالت له: روح جيب. هو هم جاب الها شجر گامت رَكْبَتْلَه وجت للبيت شافت هذاك البُطُل وضَاگِتَه شافته حلو گامت وحَطَّت بالشجر وإِكْلَت عُگب جم شهر حِبْلَت البنيه.

اخوتها من شافوها لِزْمَوا الخناجر يريدون يذبحوها گامت گالت لهم ليش يا اخوتي آني إِشْرَبِت من هذاك البطل همه إِتْحاچوا بيناتهم و گالوا إحنا دَنْروح علی الجِدَّه، وراحوا علی الجده، و جابوها و كِشْفت علی البنيه وشافتها ما بيها شِي و بعده إبنيه. گاموا گالوا إحنا ليش ما عَلَّمْناهَا علی الذي بالبطل عگب جم يوم گامت البنيه جابت وَلَد من جابته گام يِگْمُز. خاله الچبير يِخَيِّط. الدنيا شِتَه، من يصير الليل يگوم يِعْلِك خاله الضُوَه هو الولد يگوم وَيطفِّي الصراج، يگُله وِلَك ما تِگْعُد، ابن الحرام.

1

فرد يوم بالليل خاله گَيْخَيِّط، گام خاله و غُفَه هو هم طفه الصرج وگال إِبكلبه أخَاف يگعد خالي ويُكْتلني گام أَخَذ الصراج و مشي يِعْلِگَه شاف بالدرب فَرِد واحد گله: عَمِّي وين رايح؟ گله: رايح أَلِّم الليل و أَفْرُش النهار. گَلَّه عمي أوگَف لي علما أَعْلِك الصراج و أجي. گله: لاما يصير. الولد طوله أَربع تَشْبَار هو هم من ما رِضْا يوگف له إِلْزَمَه وچْتِّفَه و خلاه مَحطوط بالگَع، و مشی يريد يعلك الصراج.

 جَا وشاف نار محطوطه عليها صِفْرِيَّه بيها لحم بني آدم و گاعدين اربعين ديو هم گام شال الصفريه بإِيْد وعِلَك الصِرَاج بيد. گام وطُفَه. و هم رَد شالها. هَذوله الديوات مِنْ شافوه هِيجي بيه قُوَّه گاموا گالوا وِلك شِنو هاي إِشْگَتْسَوِّي؟ گلهم: شَكو وِلْكُم؟ گام فرد ديو هو الولد من شافه جا عليه إِلْزَمَه للديو وحَطَّه جَوَه أبْطَه و عِصَرَه الديو گال: آخ آخ.

همه من شافوه هيچي جو عليه گالوله: ما دام انتَ هيچي بيك گُوَّه تعال دَنْروح علی بيت السلطان دَنْبُوگَه گال لهم ميخالف طِلْعَوا وجو علی بيت السلطان و گال لها لِلْدِنْگه هيچي و ضِرَبْهَا إِتْفَلِّشَت. و رَجع گال للديوات تعالوا جيبوا و إِنطوني فرد سيف حتی من أَخُش أَخَاف جوه حَرامِيَّه گاموا و نِطوه سيف رِجع گال لهم إِنتوا خُشّوا واحد واحد هُوَ هم خَش كلما يخش واحد يِگْطَع راسه علما خَلَّصْهُم و من يكطع راسه ياخذ أَذَانَه و خَشْمَه و يحطه بالعَليجَه، علما صَفَّاهُم.

 خش بيت السلطان و شاف بنت السلطان نايمه، ويم راسها شِمِعْدَان ذهب و يم رجلها شمعدان فُضَّه. هو گام خَلّه الذهب يَمْ رجلها و حط الفضة يم راسها و گام باسها. وأخذ من ايديها المِحْبَس و طِلع وجا وشاف هذاك الرَجَّال الْچَتِفَه گام وفَكَّه وجا الی البيت بيده الضُوَه وشاف خاله هَسْتَوَّه دَيريد يُگْعُد وگِعَد شاف الضوه مَعْلوك. صبح من الصبح الدلال يصيح إلَه الراي و الامان الذي كَاتِل الديوات ببيت السلطان ومْحَوِّل الشمعدانات و بَايِس بنت السلطان ومَاخِذ مِحْبَسْهَا كِلْمَن إِمْسَوي.......................... هالمسألة أَنطيه بنتي. كلمن يگول آني، يا سلطان آني.

يگلهم: شنو تَوَواصِيْفهَا؟ ما يعرفون كلهم يِحبسهم ما ظلوا أحد. گام گال منو ظَل گالوله أكو فرد ثَلِث وِلِد فُقْرَه گال صيحولهم گاموا جَوْ عليهم و دَگّوا الباب گالوا منو؟ گالوا: انا، گال السلطان يگول خلي دَيجي الچبير گام ديروح الولد الزغير عِرَف بالحچايه گله: خالي أَريد أَروح وياك گله اگْعُدْ إبن الجَلِبْ گله خالي يرحم أبوك، گله دِمْشِي.

 و مشوا الی ان جو لبيت السلطان هو هم الولد گِعَد يَمّ الباب و گاموا يحچون هو من سِمع گام و كُمَز و گال السلام عليكم گالوه و عليك السلام رِجَع خاله كَلَّه إطلع وِلَك رجع السلطان و گال له خَلِّيه گام الولد وگله يا سلطان اني الذي سويتها. گله إشْلون يا ولدي؟ گله فرد يوم آنا خالي گَيْخَيِّط وغُفَه كُمِت وطَفَّيت الصِرَاج گلت أَخاف يگعد خالي ويكتلني گمت أخذت الصرج وطلعت أَعِلْگه و مشيت بالدرب وشفت فرد رَجِّال گتله: عمي وين رايح گلي يا أبني آنا رايح أفرش النهار و أَلمِّ الليل گتله: عمي أوكَف لي عَلْمَا أَعلك الصرج، گال لي: انا هَمْ من شفت ما رضا، إِلْزَمْتَه و چتفته و خليته مَذْبوب بالدرب، و مشيت و شِفِت نار وجيت عليها و شافت علی النار صِفريه گمت شِلِتْهَا وعِلَگْت الصرج أثاري أكو يم الصفريه أربعين ديو همه من شافوا بِيِّه هالْگُوَّه گالوا وِلَكْ انت شنو؟

گلت لهم: ولكم انتو شنو؟ گام واحد منهم وجا يمي وعِصَرْتَه و صاح آخ آخ وفكيته همه من شافوا هيچ گالولي تعال ما دام انتَ هيچ سَبع گوم دَنْبِوك بيت السلطان گِلْتِلْهُم گاموا ميخالف وجينا و مشينا وجينا علی بيتكم يا سلطان ودُفَرْت الدِنْگه وفَلَّشِتْهَا، و گِلْت إِلْهُم جيبوا إِنطوني سيف حتی انا أَخُش و أباوع أخاف أكو أحَّد، انا خشيت گلت لهم إنتو خُشوا واحد واحد انا گُمت هو يخش واحد أذبحه، الی أن صفيتهم كلهم وأخذت آذانهم و إخْشُومهم و حطيتها بالعَلِيجَه وجيت مشيت بنص القصر شفت بنتك نايمه يا سلطان وشفت يمها شمعدانات أثنين واحد فضه و واحد ذهب، الذهب محطوط يم راسها و الفضه محطوط يم رجلها، انا كُمِت وحَوَّلِتْهُم و بِسِت بنتك و أَخذت مِحْبَسْهَا وهاك يا سلطان هذه الِخْشُوم و الآذانات وهاك المِحْبَس هذا السلطان من سِمعه و شَافَه هيچي جَاهِل وسَبعْ گام السلطان و گال يا جماعه إشهدوا علی البنيه إِنْطيتْهِيَّا گوموا صيحوا الإماي دَنِگْطَع مهر و گطعوا مهر و گام الولد دخل علی البنيه وظل عنده سبع تِشْهُر و گام أخذها ابيتهم و گعدوا علی احسن حال چنه عندكم وجينه.

================================================

حكاية المريّة وطير السعد

اهناك مهناك، أكو فرد رَجَّال عنده ثلث ولد. فرد يوم گام گال إلهم يا وِلدي أَوَّصِيكُم تره آنا مِن أموت خَسْلوني و حُطوني بفرد تابوت و خلوني علی فرد نَاگَه وين ما توصل إهناك مكاني گالوله مَيْخَالِفْ.

1

عُگُب چَمْ يوم لَف أبوهم راسَه و مات وهمه گاموا و خَسِّلوه وچَفِّنوه، و حطوه بالتوبوت، و خلوه علی ظهر الناگه عگب چم يوم گالوا الولد إِحنا تَيَّهْنَا أبونا (آخر أخاف صار بيه شِي) گاموا و مشوا ولِگَوا ثْلَث إِدروب كُلْمَن مِشی إِبْدَرُب، الِزْغَيِّر مِشَی مِشَی ما شاف الا فرد قصر وشاف الناگه إِهناك، گام إِحْفَرْلَه ودِفِنَه عگب ما دفنه، شاف يَمّ القصر جِدْرِيّه وبيها تِمَن گام يِحُط وياكل أَشو ما سمع إلا فرد مَرَه تگول: مو الفخر مِنْ حط او إِچَل الفخر لمن رَچَبْ.

 هو من سمع شال راسه علی القصر شاف فرد مَرَه وشاف فرد مناره كلها مَلْيَانه روس أَوادم إِمْعَلِّگَه. گالت له: آني خَالَّه هالتمن كلمن يِنْزِل ويايه يلعب شطرنج اذا غِلَبْتَه أَكُتله وان إِغْلَبني آخذه گال الها ميخالف هي أثاري البنية من شافته عِشْگَته گاموا يلعبون رَادَت إتْغُلْبَه رَخِّت له إغْلَبْهَا.

گام گطع مهر واخذها. ظلوا چم يوم گامت گالت له: يا رَجَّال، دَا أَحچيلك أَني فرد يوم گَا أَخْسِل راسي علی الشط وُگْعَت مني شَعْرايه آني چِنت حَاطَّتْهَا بياقوته أخاف يا بِنْ عمي يدَوْرون ويجون علينا گال لها هَيْهُو مِنْ يجي لِهْنَانَه گالت له (إِي آني دَا أَگُلْك) إِتْحَضَّر علی نفسك. أَثاري هي من ضَيَّعت الياقوته بيها الشعرايه جَا السايس مال ابن السلطان وشافها و أَخذها وفَكها، و شاف بيها الشعرايه. و گال والله أريد أَوَدِيْها لابن السلطان.

هو من وَدَّاهَا وشافها ابن السلطان، گام جهز عسكر يدورون الی ان جَوْ إلی هذا القصر هي البنيه رَجِلْهَا نام علی رُكْبَتْهَا، ما شافت الا جو الگوم. هي من شافتهم من محبتها برَجِلها ما گَعِّدِتَه گامت تبچي وِگْعَتْ دموعها علی خَدّ الولد گِعَد شافها تبچي، گال إلها: إِشْبيچ يا بنت عمي؟ گالت له (ما گِتْلَكْ) هسه يجون، هَا جو يم القصر (همه هم گالوا) گومي ولِبْسَوا سيوفهم ونِزْلَوا يتحاربون گاموا يتحاربون، كِسْرَوا رِجِل فَرَس البنيه واخْذوهَا. وإِلْتَمّوا علی رَجِلْهَا و ضِرْبوه علی ظَهْرَه ووَگَّعَوه بالْگَع وْغُمَه عليه.

هُمَّه فاتوا إِخْذوا البنيه ورِجعوا الی أن جو الی بلدتهم هو الولد حَس من الضَرْبَه وگعد شاف (لا آن ولا اَوَدَان) گام يمشي يمشي الی ان جا للولاية البنيه [جابوها للسلطان] و السلطان گَلِّلْهَا گومي دِنِگْطَع مهر، گالت له ما يصير آنا رَجْلي إِكْتَلْتوه و أريد (أسوي لَه عزه) گال الها ميخالف.

1

هي هم گامت سَوَّت عَزَه مقدار سبع تيام. الولد من جا للولايه مَيِّت من الجوع. گام جا علی جيران بيت السلطان ودك الباب وگال يا مْعَوْدين أريد منكم إِشْوَيه أَكِل، گالوله آخِر إِحنا إِمنَينّه؟

روح علی بيت السلطان، عندهم خيرات مرت السلطان ميت رجلها و سَوَّت له خيرات. گال الها يا حُرْمَه وين بيتهم؟ گالت له (فوت أَوَديك) ووَدِّتَه. گال الها انتِ دُگي الباب، گالت له ميخالف، گامت دَگَت الباب گالوا منو گال آنا گالوله شِتْريد گال أريد مرت السلطان إِلي لاَزِم وِياهَا گامت جَتِ وطِلْعت عليه هو شافها عِرفْهَا و هي هم عرفته.

 گالت له إِشْجَابَك گال الها الله جابني گالت له هاك هذا الْمَلْوِي مالي بِيعَه بالسوك واشتري خيل إِثنين ورُوح أگْعُد بِفْلان مَكان بالچول هسه آني أَجيك گلها ميخالف. هو هم أخذ الملوي وجا الی السوك وباعه وإِشتری خيل اثنين وجا الی هذاك المكان الذي عَلِّمِتَه بيه.

أَثَاري بالقُدره والقداير مِنْ تِحاچَت ويَّاه وإِنطِتَه الملوي چان العبد خَاتِل يسمع وهو صار وكت العشا طِلع العبد وجا لْهَذَاك المكان شاف الخيل الْثِنْتين مَربوطَه وهو غافي، العبد مِنْ شافه نايم جُر من إِيده الخيل وراح لي غَادي هي هم جتِّ وشافت الخيل ما شافته للعبد، لعْ من إِسْتِعْجَالها گالت له: گوم شِد علی الخيل هو هم العبد، گام شد ورِكَب وهي هم رُكْبَت گَعْ إِتشيلهم وگع إِتْحُطْهُم الی ان صار وكت الصبح إِنْدَارَت لي وَرَاهَا كَتْحَاچِيه لْرَجِلْهَا ما شافت الا العبد مَرْزوك، گالت له: شِنو هاي وِلَك؟ مرزوك چَلْب إِبن الچلب (لَيش هيچي سويت)؟ گال إلها. بيبي آنا شِفته نايم وبالشَقَه أشو جَرِّيت من إِيده الخيل أشو شِفته نايم، گالت له ميخالف هي هم بَاوَعَتْ بالچول شافت السراب گالت له يا مرزوك هاك الجود أُرْكُض جِيب إِلْنَا من هَذَاك الماي. گلها: ميخالف.

هو أَخَذ الجود و مشی و هي هَمْ مِشَت مِنَايَّه الی ان جت الی فرد عَرَب گام شيخ هذيچ العرب عَزَّبها عَبَالَه رَجَّال و ظلت يمه يجي سبع تيام عرفها مَرَه گال الها ما دام انتِ مره ليش آني ما آخْذِچ؟ گالت له ميخالف، آنا رَجْلِي إِجديد مات، واريد أَسَوِّي لَه عَزَه گال إلها ميخالف سَوَّت عزه ثالث يوم صار الليل إِنْهزمت وجت الی عرب الْلَخْرهَ.

هاي إِشْگَد صار يدورون عليها؟؟ صار أربعة السلطان ورجلها و العبد و شيخ العرب. و من جتِّ الی عرب اللخره گام عَزِّبها شيخ هذيچ العرب بُگَت عنده ثلث تيام و عِرَفْهَا مره گال الها ما دامت انتِ مره، انا أريدچ. گالت له: ميخالف آنا رجلي إجديد مات واريد أسوي له عزه گال إلها ميخالف گام إِنْطاهَا إفلوس و سوت عزه رَادَت تِنْهِزِم ما گِدْرَت الی إنْ خِلَص العَزَه گال إلها: يَلَّه گومي دِنِگْطَع مهر. گالت له (خلي هسه) إحنا من عادتنا اذا رِدْنَا نِزَّوَج نِگْعُد أربعين يوم بنص الشَط، وَيَّايَه آخُذ أربعين ابنيه گال الها ميخالف.

گام انطاها اربعين بنيه وخَلاّهم بالسِفِينه ودَز وياهم عسكر بنص الشط . گالت للعسكر إنتو رُدّوا إحنا شَكُو علينا، گاموا العسكر ورَدَّوا. هي هم صار عُگُب ساعتين گِطْعَت الحبل وسَيِّسَت بالشط، الی أن جَتْ علی فرد جزيره ما شَافوا الا أربعين خَيَّال. گالت آخ (إشْلون هَايْ)؟ هَذوله جَوْ علينا.

 گامت گالت للاربعين بنيه هَسَّه من يجون علينا إِحنا نِتْرَحَب لهم. وهمه جو گامت إِلهم وگالت الهم أَهْله بيكم إِحنا گاعدين نِنْتِظر كم گالولها وانتِ أَهْلَه بيچ. گالت الهم إِحْنا أربعين وانتو اربعين كل واحد ياخذ وِحْدَه گالولها گومي دنگطع مهر، گالت لهم خلي هسه احنا من عادتنا اذا نريد نْسَوِّي عِرِس نْشَرِّب لِرْيَا جيلنا گهوه.

گالو لها: ميخالف گالت لهم: لكن مِن نِنْطيكم الگهوه يكون كُلْكُم تِلْزَموهَا وانا أگُلْكُم إِشربوها إِنتو (فرد دَيرهَ إدِّيْرُوْهَا براسكم) گالولها ميخالف. گامت هي ودَكَّت لهم گهوه وفَوِّرَتْها وحطت بيها بَنْج وصبت أَربعين فنچان شَالت الأربعين أبنيه كِلْمَنْ، إنْطِتَه لي رجلها و گالت لهم: إَشِرْبوا. همه ههم من شربوه (گُولو هيچي) ووِگْعَوا و تَبَنِّجوا.

هي هم گامت نَزْعَتْهُم إِهدومهم و إخذتها و مِشت وياها الاربعين ابنيه وجت علی فرد إِوْلايّه هذيچ الولايه أثاري ميت إِجْدِيد السلطان مَالْهُم وگَامْشِين طير السعد همه فَكُّوه جا وحط علی راسها هُمَه عَبَالهم هاي رَجِّال گاموا وحطوها سلطان هي هم كعدت علی التَخَت و لِبْسَت التاج و گامت تِحْكُم و إِنْطَت فرد أَمُر أن يصَوْرون صورتها و صورة الأربعين إِبَنيَّه و حَطِّطهُم علی باب السراي. وگالت كل من يبَاوع عليها و يحچي جيبوه.

 ظلوا همه يدورون عليها شيوخ العربان و الأربعين رجال الذي بَنِّجَتهم ورَجِلْها و السلطان و العبد. بهَذِيچ الساعة فات العبد وبَاوَع الصُوَر و گال: آخ مَرْت أَگَاتِي إِشْلونِچ؟ گاموا العسكر و كُمْشوه. وگالولها: هذا العبد، گالت خَلّوه وجا رجلها. و هم باوع و هم كمشوه.

 وگالولها هذا هم حِچَه علی الصور گالت جيبوه (هي شافته) كَيِّفَت وگالت وَدّوه للحمام وخلوه يِخْسِل زين، ولَبِّسوه (قَاط إِهدوم) و ثالث يوم فاتوا العربان و الأربعين رجال و هم شافوا الصور ولِزْموهم و جابوهم. هي هم جمعتهم كلهم گالت إلهم إنتو إِشْتِرْدون من هالصور؟ گالولها يا سلطان (هاي هالْمَرَه) سَوَّت بينا نكته.

وجابت رجلها و گالت له انت (شنو گُصْتَك) وِيَّه هالصوره؟ گال إلها: هاي مرتي و آني إِهوايه أحبها، وأخذوها مني وهاليوم چَمْ شهر أدَوِّر عليها و هسه جيت إِهْنَايه، و شِفِت صورتها و كيَّفِتْ و فْرَحِتْ، گالت له: دِگْعُد إِهنايه گامت گالت: إِكتلوا العبد. گاموا كتلوه. و گالت إكتلوا السلطان. واكتلوا العرب الذي بَنِّجَتهُم وكتلوهم. وبُگَوا شيوخ العرب الأثنين واحد أبو الاربعين إبنيه و اللاخر و گامت كِتْلَت هذاك الاخر وخَلّت ابو الاربعين بنيه گامت و إِنطِته بناته الاربعين وجابت رَجِلْهَا وگالت له تَرَه آني مَرْتَك ...............................................................................

انتَ إشلون آدمي ما تصير خفيف. وگامت إحْچَت له الحچاية من الاول الی التالي.

هو من سمع تعجب گامت عگب چم يوم جِمْعت المجلس وگالت لهم يا مجلس تره آني مَرَه و هذا رَجْلي أَريد أسويه هو سلطان گالولها بكيفچ هي گامت ونزعت التاج من راسها وخلته بْرَاسه وگعدوا علی احسن حال چنه عندكم وجينه.

===============================================

(بنت السلطان والبغونچي الاگرع)

اِهْنَاك مَهْنَاك، اكو فرد سلطان، عنده ثْلَثْ بنات البنات كبروا و ما أحد أخذهم گاموا البنات و گالوا و الله نريد نْد‍ِز الی أبونَه ثلث بطيخات إِمَّرْمُگات، بَلْكَتْ يفيق بالحچايه.

گاموا و جابوهن للبطيخات و حطوهن بالصينية و بَرْگِعوهَا و بِعْثوها بيد الخدامة. هي هم جابتها وانطتها للسطان بنُص المجلس كَشَّفوا الصينية و شافوا البطيخات گاموا الجماعة گالوله: تره يا سلطان بناتك يريدن إِرْيَاجيل.

 گام گال ميخالف ونِطَه فردَ كلام يصيح الدلال باجر كلمن يجي لازم يفوت من جوه گُبَّة بنات السلطان كل مَن يِحِبَنَّه يِذِبَّن عليه رُمَانَه ونكطع له مهر. الناس كَيَّفوا هذا يگول هسه آني يذبون عليّ، و هذا يگول هسه يذبون عليّ، أثاري البنت الزغيرة فرد يوم گاعده بالقصر گَعِد إِتْباوع علی البستان ما شَافت الا البَغْوَنْچي الأَگرع مال بستانهم نِزع من راسه الكَرْشَه و لِبَس فرد إِهدوم و طِلَع إِبراسه كَعْكُولتين وحده ذهب و وحه فضه و من لبس إِهدومه صار مثل الگمر گامت البنية عشگته.

هي البنية گالت من يفوتون الناس ما أَذِب عليهم، من يفوت الأگرع أذب عليه. صار ثاني يوم الناس إِنْجِمْعوا، و البنات گاعدين بالشَنَاشِيل.

1

فاتوا الناس اثاري البنات الثنتين عندهم وِلِد عم فات أول واحد ضُرُبْتَه الچبيره بالرمانه واخِذْته. عُگب مشوار فات اللاخر و ضربته الوَصْطَانيه واخذته. ظلت الزغيره يَاهو اليفوت ما تِتْحَرَش بيه، الی ان خِلْصوا كل الناس ما ظل أحد. گال السلطان: بعد ما ظل احد گالوله ما ظل أحد لكن أكو البغونچي مال البستان هالولد الاگرع.

گال صِيحولَه. هُمه صاحوله. هو جا وفات كُمْشَت الرمانه و ضربته. گام ابوها إِتْگَدَر وزِعَل عليها. گال الها: انتِ بنت سلطان تاخذين وَلَد أَگْرَع، ما تستحين؟؟ گام وهِجَرْهَا. وگال خلّوها هي ورجلها بالمطبخ.

هي گامت إِتْرَچِب و تَاجِل. السلطان گام وسَوَّه عِرِس يجي عَشَرْ تِيام، وسوه سَاسْ، و مَزِيْقَه، و عِزَم كل الناس، و فرحان بْوِلد أخوه و بناته الثنتين چَيف إِخذوا بنات عمهم وگعدوا متونسين، و گام الاگرع و لِبَس إِهدومه الزَينَه و دخل علی مَرْتَه بْلَيَّه حِسْهُم. وأم البنيه مرت السلطان تجي عليها تگلها: ليش يا بنتي هيچي سويتي؟ عُگُبْ چَمْ شهر گام الاگرع واشتری فرد بَغْلَه عَرْجه.

 كل يوم يطلع يركبها. يگومون الوِلِدْ يضربوه و يصيحون (دَانْ دَان أَگرع نِسيب السلطان). فرد يوم صارت مْحَارُبَه عند السلطان وَيَّه سلطان الإِفرنك گام جَهَّز عساكر و بعثهم كل يوم يِنْكَسرون.

 گام السلطان و بعث وُلد أَخوه علی الافرنك يتحاربون گاموا إنْكِسْروا الإفرنك. وجَوْ من المحاربة إمكيفين. ظلوا چم شهر فرد يوم تِوَجع السلطان و گال أريد لحم غزال علی شوربه گاموا كل الناس يصيدون و يجيبون و بقدرة الله يطلع مُر واتصير الشوربة مُره مثل العَلْگم. گام گال الی ولد أخوه: روحوا جيبولي لحم غزال يكون مَاكُش مثله.

همه هم إِخذوا الچِوَادِر و طلعوا بالچول و نصبوها، واخذوا وياهم إسْلُوگِيَّات، راد يصيدون ما گِدروا، ظلوا يجي (ثلث تيام) و ما صادوا شَيْ. الاگرع مِنْ سِمَع بهالحچايه، گام واخذ هو هم إِچْوَادِر و نصبها بالچول و اول نهار صاد يجي عشرة و همه ما صادوا و هو صار صاد يجي عشرين. گام بِعَث أَحد عليهم گلهم: تَرَه أكو إِهْنايّه لحم غزال.

1

 گالوله صِدُك؟ گال لهم:إي لهم آنا بفلوس ما أبيع، لكن كل من يريد أطُمْغَه بردفه و أنطيه. هذوله من سمعوا گالوا إِبخاطرهم خَليّ ناخذ منه و يِطمغنا، هو إِمْنين يعرفنا. گاموا گَلّولَه: ميخالف.

 هو هم جاب طَمْغَه و طُمَغْهَم و إنطاهم ثمانيه همه إخذوها، إِجو إِمكيفين هسه يِرْضَه عليهم السلطان: هو الاگرع گَبُل ما يوصلون الولايه وُصَل گبلهم، وجا علی مرته، و گال الها: (هِيچي وهيچي) الحچايه. انتِ گومي و سَوِّي شوربه الی ابوچ يكون زينه و هذا لحم غزال هُمَّه الولد من رجعوا رَكِّبوهَا شوربة بقدرة الله طِلعت مُرَّة مثل العَلْگَم. كُمَشْهَا وچَبْهَا. البنيه مرت الاگرع ركبتها وحطتها بالماعون صارت مثل الگيمر.

جَتِّ علی أمها گالت لها يَُمَّه هَاچ هالْشوربه وَدِّيهَا لَبويه خلي ياكلها گَلَّتِلْهَا: فوتي فوتي ليش [شوربه] كل الناس ما أكلها و مال وِلْد أخوه ما اكلها عاد مَالْتِچ ياكلها؟ و هو زعلان عليچ؟ گالت لها يا يمه مَيْخالِفْ انتِ وديها والله هسه ياكلها، ويتْعَافَه. هي امها گامت وانطتها لبو البنيه رَجْل المَرَه السلطان.

هو حَطْها إِبْحَلْگه شافها مثل الگيمر و مثل الشَكَر. گال: أوخ هَايْ مَالْ مَنْ؟ گالت له مال بنتك مرت الاگرع گال: زين، وتْعَافَه. السلطان عُگب چَم سنه صارت مْحَارُبَه ويَّاه وَيَّه سلطان الإفرنك. گام السلطان بعث ولد اخوه اول يوم كسروهم الْوِلْد أخوه. الاگرع من سمع، گام ركب بغلة العَرْجة وطلع.

الوِلِدْ من شافوه، گاموا يضربوه و يصيحون: دان دان اگرع نسيب السلطان الی ان جا لي راس الچول و حَط البغله بْفَرِد مَغَارَه أَثاري الولد إِبن چان. گام طَلَّع شِخَاطه و شَعْرايَات شِعل الشعرايات و طِلْعَت فرد فرس مَاكُشْ مثلها هو هَمْ لِبَس إِهْدومَه ورِكَب الفرس.السلطان طلع يباوع علی العسكر ما شاف الا فرد واحد جَا يركض و مشی علی عسكر الافرنك و گام يُكْتل بيهم.

الفَرَس مَالْتَه تِكْتِل عَشْرَه، وهو هم يُكْتِل مِيَّه. الی إن صار وكت المغرب، طلع من بين العسكر، و ركض وجَا الی المغاره، ولِبَس إِهْدومَه العَتيگَه. گام السلطان گال: أَمَان إشلون ولد هذا؟ إمنين هذا الخاطر الله؟ گالوله ما نِعِرْفَه. صار ثاني يوم هم گاموا يتحاربون.

و هم طِلع الأگرع، وركب بغلة العرجة وطلع همه شافوا گاموا يضربوه و يصيحون دان دان اگرع نسيب السلطان و هو ما يدير بَالَه عليهم، عَلْمَا جا الی المغاره و خش بيها ورُبَط بغلة العرجة و طَلَّع الشعرايات و عِلَگْهِن و طلعت فرد فرس إهدوم، گام ولبس الهدوم وركب الفرس وجا علی الافرنك و هم شافه السلطان و كَيَّف، وراح يتحارب أَول ما نِزَل للحرب گام يكتل وأخذ منهم عَشْرِ إِوْلايات و السلطان كَيَّف.

 گام السلطان گال: الله الخاطر الله إِلْزَموه شِنو مِنو هذا؟ هو من خَلَّص و انهزموا الافرنك و صار وكت العصر، إِنهزم من يَمْ العسكر گام السلطان إيصيح أوگف أَغَاتي ما يْرُدْلَه.

 وهَذولاك ولد اخوه صَافْنِين و يتفرجون مثل الْزُمَايل. صار ثاني يوم هم طلعوا و طلع السلطان يتفرج و يباوع علی العسكر و گال اليوم اذا جا الولد إِحصْروه لاتْخَلّوه ينهزم گالوا ميخالف هو صار وكت الصبح، گام الأگرع و ركب علی عادته هو طلع شافوه الولد گاموا يضربوه و يصيحون دان دان أگرع نسيب السلطان هو ما يديرلهم بَالْ، ومشی الی ان جا بْهَذيج المغارة و عِلَك الشعرايات وطلعت هذيچ الفرس و الهدوم وركبها، وجا يتحارب إِتْحَارب وكِتَلْهُم كلهم وإِنهزموا وإلْتَمَّوا عليه يجي أَلفْين واحد وإِنْجِرَح من إِيده و فَضَّوا من المحاربة، و خِلْصَت.

 جا يريد يطلع لِزْمَوه وجا السلطان عليه شَافَه مجروح من إِيده گام السلطان وطَلَّع چَفِّيته وشَدْ ايده، وإِنهزم الوَلَد. رجع السلطان فرحان، بَسْ مقهور مِنْ جَدْوَه الولد چيف راح و ما إِتْحَاچَه وياه.

وجَوْ للبيت فرحانيين ورجع الاگرع البيتهم وحِچَالها الْمَرْتَه ورَوَّاهَا الجرح، والچَفِيَّه مَالت أبوها، هي البنيه گامت إِخْذَت الچفيه وجابتها لَمْهَا وگالت يمه شوفي رَجْلي إِشلون هِزَم الافرنك، وإِنْجِرَح وابويه شد إِيده بچفيته گالت لها: فوتي فوتي انتِ چَذْابَه زين رجلچ أگرع، و كل النهار نايم مثل البغل، بس ياكل گالت إلها گومي أَشَوْفِچ الجرح گالت لها أَشو گومي جَوْ الی المطبخ وچان الأگرع نايم وفكَّت إيده وشافت الجرح بيده.

 هي هم طَلْعََت مَرت السلطان، وجت علی رجلها، گالت له هذا الاگرع أَشو مجروحه إِيده و مَشْدوده بچفيتك؟ و هاي هِيَّه چفيتكك. گال عجايب.

 أشو گومي عليه. همه جو عليه، وشافه زين إِعْرَفَه و گَالَّه ما دام هيچي انتَ يا ابني ليش ما تكُلِّي كَلِّه هذا نصيبي و گام الاگرع وحچاله بحچاية لحم الغزال يوم الذي جابوه ولد اخوه گله آني إِنْطَيتهُمْيَاه وإِمْهَرِت ادبارهم انتَ إكْشِف عليهم السلطان هم صاح إِلْهُم وكِشَف عليهم و طلعوا تَمَام گام طِردهم وجاب بِنْتَه مرت الاگع و صالحها وجَدَّد عرسهم من الأول وسَوَّالهم إِفْرَاش گله من فضه ودخلوا وگعدوا علی احسن ما يكون چنه عندكم وجينه.

================================================

حکایة بنت الخیاط

اهناک مهناک، اکو فرد خیاط وعنده ثَلِثْ بنات وحده چبیرة و وحده وَصْطَانِیّة، وحده زِغیره.

فرد یوم طِلْعَن یسَیَْرَن بالدرب شافهن ابن السلطان. و عِشَک وحده منهن گام ابن السلطان ودَز مَرْمَرْ إلی أبو البنیه الخیاط گله (خَلِّی إیفَصْله) و یخیط لی منه فرد (قَاط إِهْدومْ). من سمع الخیاط، ظل متحیر. وجا مقهور للبیت. جت علیه بنته الچبیرة گالت له: یابه إِشْبیک؟ گال الها با بنتی ما بِیَّ شی.

جت الوصطانیه گالت له: یابه اشبیک؟ گال الها یا بنتی ابن السلطان دز لی مرمر یگول فصلها و خیطها قاط اهدوم ویا یمه آخر إشلون المرمر یِتْخَیَّط؟ البنیه گالت له إشلون های؟ وجت الْلُخْرَه الزغیرة گالت له یابه: اشبیک هو همین إِحچالها گالت له لاتخاف آنا عندک، انتَ روح للچول ولِمْ صخر ناعم و حُطَّه بالچفیة وودیه للمجلس، هو یِگْعُد ابن السلطان گُله یا بن السلطان انا فَصَّلت الهدوم بس یرید لها إِخیوط آمُرْ الجماعة یِفْتِلوهَا.

1

هو من سمع من بنته گال إی والله (های خوش إحچایة) و طلع وجا الی بیت السلطان. عگب مِشْوَار إنَّصَب المجلس و خَشْ للمجلس وسلَّم علیهم و گالَّه یا ابن السلطان آنی فصلت لک الهدوم، و یْعُوزهَا إخیوط هاک هذه خلی الجماعة یعاونوک بیه بالفَتِل.

گاموا الجماعة وگالوا های اشلون یصیر الصخر یِنْفِتِل؟ هو هَمْ گال إلْهُم بس یا جماعة إشلون المرمر یتفصل؟ رَد ابن السلطان گاله تعال گول لی های مِنو عَلَّمک علی حْچَایة الخیوط؟ گله بنتی الچبیرة: گله چِذ‍ِبْ، رجع کَلَّه: الْدِنیا علمونی. گله چذب. گول لی الصِدُک گله: بنتی الزغیرة من گله بنتی إِتعَجَب ابن السلطان، و الخیاط رد المرمر علی ابن السلطان وجا للبیت.

 و البنیة کل یوم گامت گِعْدَت بالملا کل یوم تفوت الصبح و المغرب و ابن السلطان من سمع گِعْدَت بالملا گام یگعد بالشباچ من إِتْفوت ویشوفها یگُللها: بنت الخیاط إِشْتُگْلین؟ تِرْجَع تِگُلَه: حُمص وصْقولی و یُقولِع کل إِفْضُولی انت شنو و تمشی.

فرد یوم ابن السلطان من قهره راح علی مُلاّتْهَا، و گال إلها: یا مُلاّ الخاطر الله هاج هذه ثَلَثْ میت لیره وانطینی البنیه أبوسْهَا گالت له دَاگُلَّک انتَ روح و جیب حَلاوَه و سَوِّی نفسک بَیَّاع حلاوه هسه یطلعون علیک البنات و انتَ إلْزَمْهَا و بوسْهَا هو هم راح و جاب (غراض أبو الحلاوه) و خلاّهَا علی رأسه و صاح حلاوه حلاوه من سمعوا الصِنَّاع گامت المُلِّیَه و نِطَت الی الصناع کِلّمَن.......

وِصْلَه حدید حتی یشترون حلاوه. هو هم إِنطاهم الکل الصناع. تَمَّت فرد بنت الخیاط تْگُلَّه هاک بیعنی، هو یگلها أوگفی هسه، دی خَلّص کل الصناع ظلت بس هیَّ و الصناع خَشَّوا للبیت و هو هم لِزَمْهَا و چان یبوسها ویِگْرُصْهَا و إِنطاها کل الحلاوه و إنهزم. هی هم خشت تبچی علی مُلَّتْهَا گالت لها میخالف یا بنتی هذا شَافِچ مثل بِنْتَه و هِیچ سَوَّه. صار العصر إنصرفوا الصناع. جَتّ بِتَّ الخیاط الی بیتهم تمشی شافها من الشباچ ابن السلطان گال إلها بنت الخیاط إِشْتَکْلین یَلّه.

1

هی گالت له أوی حمص و صقولی و یقولع کل افضولی انت شعلیک رد گلها آخ، لیش تگولین عمی الله یبْعَث لَکْ، إنطینی الحلاوه أَول الی، گالت له آخ، أثاری إنت سویت هالسوایه میخالف. وعضت إصْبَعها، البنیه إنقهرت وجت علی ابوها گالت له یا به أریدک تسوی، لی جِلد مال إِصْخول ألبسه. گال الها میخالف گام راح وسوالها ولبسته وجت الی أن صار وکت العشا ودگت باب بیت السلطان گالوا منو گالت الهم انا مَلَک الموت فُکو الباب. همه هم فگوها الباب، گالت دَلونی علی ابن السلطان دَا أَگْبُض روحه.

 همه من سمعوا، خافوا، گاموا گالولها یا ملک الموت لیش علی هذا) هاک إِِمْبَدالَه العبید کلهم، هی ما رِضَت خَشَّت علیه بالگُبَه الولد چان نایم گامت گَعِّدتَه. هو من شافها بهالصوره خاف و إِنچِفَه علی وجهه. هی هم طَلَّعَت راس فِجِل من جیبها و حَطَّتَه بیه و طِلْعَتْ هو الولد ظل إِمْشَبّح هسه یموت باچر ایموت، إِشْوی لاَخْ ایموت.

 أهله من شافوه بهالصوره گاموا یصیحون و یبچون والولد گام یون، و یصیح. (صبح من الصبح) گالوا ابن السلطان وَجْعان هی من سمعت گالت خَطیَّه اخاف یموت گامت لِبْسَت إِعمَامَه، و صارت مثل الحکیم، و لِزْمَت بیدیها عِکَاز، وگامت إتصیح: حکیم حکیم. وجت بباب بیت السلطان وصاحولها تعال یا حکیم شوف هالولد.

گال میخالف خَشَّتْ گالت لهم: هذا دِوَاه یِرْهم عندی. گالت إلهم إنتو إطلعوا من الگبه. همه طلعوا، جَرَّت راس الفجل منه و چان یگعد هی من شَافَتَه گاعد خَلَّت وطِلْعَت گاموا أهل السلطان من فرحتهم یضحکون و مکیفین فرد یوم هو الولد ابن السلطان گام وگِعَد بالْشِبَاچ وفاتت بنت الخیاط وگلها بنت الخیاط شتگولین گالت له حمص وصقولی و یقولع کل فضولی گال إلها: بَّالِچ یوم الذی گِلتی لی عمی إنطینی کل الحلاوه هی؟

1

 گالت له: بَسْ بَّالک یوم الذی حَطیت بیک راس الفجل؟ کلها آخ أَخَاف انتِ و عض إِصبعه و إِنقهر، و گام وجا علی ابوه و گله یا به أرید منک تخطب لی بنت الخیاط. گله أبوه یابه میصیر هذوله إِخْیَاییط و إحنا اسلاطین إشلون (نَاخُذ منهم مَرَه)؟ گال له ما یصیر الا آخذها. گام ابوه و بعث خطابه الی الخیاط بأن انا أرید منک بنتک، گال له میخالف هو هم جا الخیاط للبیت و حچالهم گالت له البنیه یَابَه زَوِّجنی گاموا بیت السلطان بعثوا فلوس و گطعوا مهر.

صار ثانی یوم بِعْثَوا فلوس الْحَک گام ابو البنیة وراح الی السوک و إشتری الها جَهَاز و خَیِّطوا الِفْرَاش و سووا حَمْلَه و بعثوها بیت السلطان. أَثاری مِن نیة ابن السلطان هی من تجی عنده باللیل یرید یکتلها و هی بنت الخیاط عُرْفَت بهذه الحچایه گامت البنیه گالت له: یابه أَرید منک ظَرُف عسل. گلها میخالف. جاب الها الظرف العسل. هی هم لِزْمِته و خَطِطِتَه ودَیرُمِتَه و شَدَّت براسه جِتَایه، و خیط.

گاموا اهل السلطان وجو ببیت أهل الخیاط یریدون البنیه گاموا اهل البنیه وزَوِّگوهَا وزفوها ووَدّوهَا ببیت ابن السلطان البنیه إِخذت ویّاها الظرف العسل صار وکت المغرب جابوها وحطوها بالگُبَه. هی هم جابت الظرف العسل ولَبِّسِتَه إِهدومها، وخَلِّتَه عی الْچُرْبَایه. ولِزْمَتْ الخیط.

 هی خِتْلَت جَوَه الچُرْبَایه مِن إِتجُّر الخیط یگوم الظرف یهز راسه. لما صار وکت العِشَا جابوا ابن السلطان و خَشِّشَوه علی البنیه بالگبة، أول ما خَش گلها: إی بنت الخیاط إِشلون سویتی نُکته وحطیتی راس الفجل هی اجر راس الخیط وِینهز راس الظرف، هو گام لِزَم الخنجر و ضربها و إِنْچَب الظَرُف هذا گام یِلْطَع شافه حلو، گال آخ، یا بنت الخیاط هیچی دَمِج حلو بس انتِ إِشْلونِچ گام یِتْحصر و گال والله ما دام آنا إِکْتَلِتْهَا البنت الخیاط الا أَکْتُل نفسی. گام یرید یضرب نفسه، و چان تطلع من جَوَّه الچُرْبَایه و گُضْبَت إِیده گالت له خلی نفسک من هیچی أَشیاء.

هو من شافها (طلعت مو میته) إِهوایه فُرَح گام بْهذیج الساعة و دخل علیها صبح من الصبح جت أم الولد وشافتهم نایمین سِوَه علی الچربایه گامت إِتْهَلْهِل حَسَّوا من النوم فرحانین و گعدوا علی احسن حال چنه عندکم وجینه.

=================================================

حکایة اطباشی ذهب

اهناک مهناک، أَکُشْ فرد رجال و مره عنده فرد ابنیه عمرها سنه. فرد یوم ام البنیه إِتْوَجَّعت یجی عشرین یوم و گامت إِترید إتموت، گامت وَصَّت وِصِیَه و أَمِنَتْ أَمانَه گالت: های الْصِنْدَقْچَه حطوها علی الرف اذا انا مِتت ما أَحَد یفکها، الا عَلْمَا تکبر بنتی وتْنوش الرف یَلَّه وهی إِتفکها بیدیها. گامت الْمَرَه لَفَّت راسها و نامت و ماتت.

 گام رجلها چَفَّنها و دفنها. البنت اسمها (أطْبَاشِی ذهب) هذا ابوها کل شهر یجیبها و یرید إینَوَّشْهَا الرف ما تنوش بعدها إزْغَیْرَه. عگب جم سنه صار عمر (أطْبَاشِی ذهب) عشر اسنین جابها ابوها دَنْتوش الرف ما نَاشِتَه. خَلاّها گام ابوها یرید یتزوج و یخطب علی کیفه مَرَه یکون حِلوه مَاکُشْ مثلها. عگب جم یوم گال لها لْبِنْتَه (طباشی ذهب) با بنتی مَتِجین تَصعْدین علی المْخَدَه بُلْکی تْنوشین الصندقچه أَشو شکو بیها.

هوَ گام و جاب المخده و حطها جَوَه رِجِلْها و ناشتها و جابتها و فکوها، من فکوها طِلَع بیها خِشِل و ذهب مال أمها گام ابو البنیه گال لها مَتِلْبَسیها هی هَمَّین گامت لبستها صارت فرد إِبنیه بالدینه ماکش مثلها هوابوها من بَاوَعْهَا گال لها (بَسْ ما دام انتِ هیچی حلوه) آنی إِلْوَیش مِتْعَذِب و گَا أَخْطُب مره، انتِ صیری مرتی. گالت له (إِشلون إِیصیر) یا یَابَه؟ آخِرْانتَ أبویه، و آنی بنتک. هو من سِمع هیچی طلع للسوک وکت الظهر، جا و بیده فَرْدَه مَالْ قُبْقَاب کلها إِزْمُرَّجْ و یاقوت یِلْهَث یِلْهَثْ مثل الگمر گام گلها یا طباشی ذهب با بنتی گومی إِخطبی لی فَرِدْ مَرَه یکون یِرْهم هالقبقاب بِرجِلها. هی هم أخذت القبقاب، وطلعت إِدَّوّر. گامت إِتْخُش بیت و تطلع من بیت، و ما یرهم القبقاب. ودارت کل الدنیا. هو من سِمَع هیچی گَلها أَشُو انتِ إِلْبَسیه هی لِبِسْتَه بْقُدْرَه من القدایر رِهَمْ علیها صار مثل الْمِحْبَس برجلها، هو من شاف رِهَم علیها کَیَّف، و گال: یا طباشی ذهب ما دام علیچ رهم انت إِتْصیری مَرتی، یَلّه گومی دَنِگْطَع مَهَر. گامت گالت له یا به ما یصیر حرام علیک. گلها: ما یصیر. راح صاح الإِمَامی، و گِطع مَهَر طباشی ذهب. شافت ماکش مَفَکَّه گالت و الله من یجی أخلی یروح دَیْسَوّیلی شِمعدان مال فُضه. هو من رِجَع گال الها: إتْحَضَری، تَرَه بَاچِر أَجی أَدْخُل علیچ. گالت له: أنا أرید منک شِمِعْدَان یکون بیه مکان حُبّ و مکان نومَه و مکان طَهاره و بیه قُفل و مفتاح من جَوَه گال لها میخالف، کل ما تریدین آنی بْرَسْمِ الخدمة. هو هَمْ طِلَع و راح علی الصایغ و حِچَاله، گله: میخالف وسَوَّاه، وجابه للبیت، گام گلها:-

یا طباشی ذهب انا رایح من أجی هسه أدْخُل، لازم انتِ إِتْخَطُّطی و إِدَّیرُمی گالت له میخالف.

هو من طلع گامت اطباشی ذهب و أخذت ویاها أربعین گُرْصَة خبز و خلتها بالشمعدان و جابت الحِب و حَطِته و جابت کل غَرَاض الحوش یگفیها قَدَر میت یوم، و خَشَّت بالشمعدان و قُفْلِتَه علیها، هو هم صار العِشَا جا للبیت إِمْکَیِّف یرید یدخل. دَک الباب، ما أَحَد جَآوبَه.

تمِّ یدک و یصیح یا طباش ذهب فُکی الباب و ما أحد یجاوبه. ظل یِهْطُر بالباب یجی أربع ساعات یا طباشی ذهب فکی الباب جِزِتْ، ما أدخل. ما أحد یرد له. گاموا الْجِوِارین و إِنْدَارَوا و فکو الباب، و ما أَکْشْ أحد بالبیت. و یصیحون یا طباشی ذهب اطلعی دَوْرَو ما لِگوها. گام هو أبوها نام من قهره صار وکت الصبح یصیح و یدور وما گله، أَیَّسْ عگب جم یوم، گال و الله ما دام اطباشی ذهب و هی رَادَت الشمعدان، وهسه مَذْبوب بالحوش إْلا أَگوم وَوَدِیه للصایغ و أَرُدَه علیه. گام صاح فرد حَمّال إنْطَاه قَمَری گله گله شیل هذا ویّایّه. الحمال شال الشمعدان و جا به للصایغ. الصایغ من شافه عِرَف بالحچایه، گله أَشو جِبتَه؟ گله: ما أریده. گله: میخالف جِیبه، و هاک إِفْلوسَک. هو أخذ الفلوس. انتَ الصایغ گوم و شَیْلَه للحمال، وودیه لابن السلطان و حِچالَه بالحچایه، گله: بیش إِتبیعه؟ گله بمیتین لیره. گله: میخالف. الیهودی الصایغ گله: یا ابن السلطان إِتْگَیَّد علیه و حُطَه إِبْگُبَه، و حُطْلَه أَکِلْ. گله: بلی.

ابن السلطان صَعِّدَه بالگبة و وَصَّه أمه گال لها: یا یمه (إتْشوفینی إِبعین و تشوفین هالشمعدان بألف عین) گالت. میخالف یَابَه گال لها کل یوم حطی الصبح أکل و المغرب أکل تره أنا من أطلع إظَّل روحی بیه، قَشْمَرْهَا. ظلت یجی أربعْ تِیَام تحِط الأکل إِتْشوفه مَاگول أتاری ابن السلطان عنده بنات عم إِثْنَعَشْ وِحْدَه وگبُل ما یشتری الشمعدان بیومین راد یخطب منهم وحده هو اشتری الشمعدان بَطَّل. بنات عمه سِمْعَوا بَطَّل گالوا: لیش شنو السبب؟ هو کل یوم یجی یم الشمعدان و یبَاوْعَه یشوف (ما علیه شی). گام گال:إِذا ما تِطِلعین من الشمعدان تره راح أکْتُل روحی. هی من سمعت طباشی ذهب، فکَّت الشمعدان، و طلعت و گالت له: إِسْتَر علیّ الله یسْتُر علیک گام بهذیچ الساعة گطَع مهر وأخذها اشلون صارت عنده عزیزه وهی مثل الگمر تِشْتِعِل.گام جا علی أُمَه گلها. یا یوم تره الشمعدان هو روحی اذا إِتْگِطْعین الأکل تره أَموت گالت له یابَه لیش أگطع الاکل. فرد یوم السلطان عنده مْحَارُبَه. ودَز علی إِبنه لازم تجی هو من سمع راح یطلع، جا علی أُمه گلها: یوم هذا المفتاح ضُمِّیه عِندچ مال الگبه، انا طالع لازم تِتْگَیدین علی الشمعدان، أخاف یِجون بنات عمی و یِقَشْمروچ و یاخذون منچ المفتاح، گالت له: بَهْ یابه، إشلون أَنطیه؟ گال إلها انتِ إِعُرْفی من ما گام یاکل المشعدان اعرفی آنی میت. گام بَاس إِید أمه من طلع سِمْعَوا بنات عمه گالوا و الله أَشو ابن عمنا من اشتری الشمعدان ما أَخَذْنَا جَاز مننا (الا أَکُشْ) فرد شی بهالشمعدان.

جَوْ علی مرت عمهم و هی عجوز ام الولد گاموا إِثنین یشِجْرُون التنور و عشرة گاموا یفَلون أم الوَلَد، ویگُللولَها: انتِ لیش هیچ وَصْخَه؟ ما عِنِدچ أَحد یداریچ؟ تْگُلْهُم ما یخالف گاموا یفلون بیها و نامت علی إِیدیهم همه بَاگو المفتاح من جیبها و صِعْدَوا فکّوا الباب و نَزِّلوا الشمعدان و حطوه علی صدر التنور، گام یحمی هی من جَوَه إِنْچِوَت فکت الباب و طلعت، و گالت إلهم استروا علی الله یستر علیکم، گالوا لها: بُولَه لَعَد انتِ الذی مَگَتْخَلِّین ابن عمنا یخطبنا یا آهْرَه گاموا جابوا السِچاچین و جابوا إِرْمَاد و شَرَّحَوا لحمها و حَطَّوا بیه إرماد و لفّوهَا بالحصیر [و ذبوها بالچول] جتّ فرد عجوز واخذتها و گامت إِتداویها، و عند العجوز اکوش فرد چلب گام الچلب یلحس بالجروح یجی عشرین یوم، طَابَت و صارت زَینه، العجوز أُمْ الولد، من گعدت شافت الگُبَّه مَفْکوکَه و الشمعدان مفکوک جابت الأکل حَطَّته صار العصر جَتِّ إِتشوفه. شافت الأکل (هذاک هو). گالت سَوْوهَا نُکْتَه بنات عمه. و گالت لعد ابنی مات. گامت و سَوَّت عَزَه و بَچی یجی سبع تِیَّام لیش ما ابن السلطان جا من المحاربة أَول ما خَش گلْهَا: یمه إِشلون الشمعدان؟ هی شافته أُمه ساحت و فرحت و گالت: یا یابه الشمعدان ما گام یاکل و انا گلت ما دام ما أکل ابنی مات هو من سمع صعد فوک شاف الشمعدان مفکوک صاح یا طباشی ذهب یا طباشی ذهب یا عینی ما أَحَد یجاوبه. گام یبجی گال إلها یُمه أَسِئْلِچ بالله علیچ بنات عمی جَوْ یَمْچ گالت له بَلی یَابَه و فَلونی و نِمت و بَاگو المفتاح. من گعدت شفتهم مَاکُشْ، و الگبه مفکوکه. گال میخالف: الولد گام یِحْتِصِر و تِوَجَّع.

گام (نِطَه فرد خَبَر) بالولایة، کل من یجی البیت السلطان یاخذ تِمَنْ و حطب ودهن ویسوی شوربه لابن السلطان. گاموا الناس یجون و یسوون شوربه، من یجیبوها یخُوطْهَا ویَچِبْهَا بالْبَلّوع. خِلْصَوا کل الناس. ظلت فرد عجوز الذی عندها اطباشی ذهب. گال ابن السلطان (بعد ماکش أحد) گالو له: ضَلّت أَکُشْ فرد بیت إمْکَسَّر گال میخالف، روحوا وَدُّولْهَا دهن و حطب و تمن. راحوا و دولهم إخذوها من سمعت اطباشی ذهب گامت رَکُّبَت فرد شوربه سوده سوده مثل الگیر. وَصْخَه جَبّتهَا بفرد ماعون، وحَطَّت بیها الْمِحْبَس مال ابن السلطان. و گالت الها للعجوز: یُمه بید کُل أَحَد لا تَنْطیه الا بید ابن السلطان. هی هم العجوز جَتِّ علی باب ابن السلطان شافوها الخدمه گالولها: شتریدین؟ گالت أرید انطی هالشوربة لابن السلطان. شافوا الشوربة سوده گالولها زین شوربة الحلیب ما أَکلها عاد های السوده یاکلها؟ یمه إِطِلعی.

هو سمع ابن السلطان گال جِیبوها، هو خَاطْهَا و شاف المحبس إِلْزَمْهَا و (صَکَّهَا بْرَاسْهَا و گال إلها: یا عجوز عندچ اطباشی ذهب؟ گالت له إِی عندی لاتخاف هو من سمع (گام لی حیلة) وراح وَیَّه العجوز اببیتهم هی اطباشی ذهب من شافته خِتْلَت بالحجزة، گلها اطلعی آنی قَصَّرِت وَیّاچ هی هم طلعت ووگْعَت علیه و گاموا إِثْنینْهُم یبچون و إخذها و جا گال الها إشلون سَوَّوا بیچ بنات عمی؟ گامت حِجت له الحچایه من الاول الی التالی. گلها میخالف آنی إِلْهُم وجابها بیتهم وگَعَّدْهَا بالگبة وصاح گال الذی یحبنی و یریدنی إِیلِّم لی حطب، وجاب نفط وگال جیبو لی بنات عمی جابوهم الثِنَعَش وِحْدَه و حِرَگْهُم کلهم وگعد هو و أمه و مَرْتَه اطباشی ذهب علی احسن ما یکون چنه عندکم وجینه.

=============================

منبع:aljewar.org


برچسب‌ها: ویژه رشته عربی, لهجات عربی, حکایة
+ نوشته شده در  سه شنبه 28 شهریور1391ساعت 9:1 AM  توسط حسین  |